Masakra në fshatin Gjashtë, arrestohet i shumëkërkuari

Post on: 30 April, 2013 Comments Off

Bledi Ruçi, njeriu që brenda një harku të shkurtër kohor koleksionoi një seri krimesh në jug të vendit, i ka dhënë fund kërkimit të tij nga drejtësia, duke u dorëzuar në polici. 27-vjeçari ishte shpallur në kërkim për vrasje, plagosje e grabitje dhe emri i tij figuron në listën e personave në kërkim nga Interpol. Dje 27-vjeçari është dorëzuar në polici pas negociatave të vazhdueshme nga ana e bluve të Sarandës. Në fundin e gushtit të vitit të kaluar, Bledi Ruçi u akuzua për masakrën në fshatin Gjashtë të Sarandës, ku u vra 42-vjeçari Ardian Beqiri. Po kështu ai është i dyshuar si autor i plagosjes së Ferdinand Xhangos e Orest Ziflajt. Më pas, gjatë arratisë, sipas policisë Ruçi është autor i grabitjeve me armë të 4 bizneseve në fshatin Shënvasil, Lukovë e Piqeras. Në ngarkim të tij gjykata kishte dhënë në mungesë masën “Arrest me burg”.
ARRESTIMI
Drejtues të komisariatit të policisë së Sarandës bëjnë me dije për “Gazetën Shqiptare” se 27-vjeçari Bledi Muharrem Ruçi, i akuzuar për një sërë veprash penale dhe i shpallur në kërkim prej mëse një viti është vetëdorëzuar dje. Mësohet se prej 2 muajsh blutë e Sarandës dhe të Delvinës kishin hyrë në negociata me 27-vjeçarin që rrinte i fshehur. Familja e Ruçit prej vitesh është shpërngulur nga Tepelena dhe jeton në qytetin e Delvinës. Efektivët e policisë i kishin shkuar disa herë në shtëpi, ku nëpërmjet familjarëve i kanë kërkuar të vetëdorëzohej. Dita e djeshme ka shënuar fundin rezultativ të këtyre negociatave, pasi është arritur mirëkuptimi dhe i akuari per nje varg veprash penale, ka vendosur t’i japë fund rebelimit. Sipas burimeve zyrtare, Ruçi ka pranuar të dorëzohet, por me kushtin që arrestimi mos të kryhej në shtëpinë e tij, por të paraqitej në polici vetë dhe kështu ka ndodhur. Dje, 27-vjeçari bashkë me avokatin e tij mbrojtës është vetëdorëzuar në komisariatin e policisë së Sarandës. Bledi Ruçi akuzohet për vrasjen në fshatin Gjashtë të Sarandës, të 42-vjeçarit Ardian Beqiri më 31 gusht të vitit të kaluar. Po kështu ai akuzohet për plagosjen e Ferdinand Xhangos e Orest Ziflajt. Gjatë arratisë, sipas policisë, 27-vjeçari ka grabitur me armë 4 biznese në fshatin Shënvasil, Lukovë e Piqeras. 42-vjeçari Ardian Beqiri, baba i 3 fëmijëve u vra me breshëri automatiku më 31 gusht të vitit të kaluar në fshatin Gjashtë të Sarandës. Gjatë kësaj ngjarjeje mbetën të plagosur edhe dy bashkëfshatarë të tij Ferdinand Xhango e Orest Ziflaj. Menjëherë pas kësaj masakre, u identifikua si autor Bledi Ruçi. Nga hetimet e atëhershme rezultoi se shkak për ngjarjen ishte bërë prishja e pazareve të drogës. Ndërkohë që për disa ditë me radhë, autori u fsheh në zonën e Lazaratit, ku dyshohej se ishin vetë banorët që e ndihmonin të arratisej.

Lajme te Ngjashme:

Categories
Tags

Comments are closed.