Festa shqiptare nga NY në Milano, dyndje në Rinas

Post on: 28 November, 2012 Comments Off

SHBA- Është e tepër të thuash që Evropa e Amerika janë veshur kuq e zi, megjithatë, shqiptarët e kanë festuar masivisht 100- vjetorin e Pavarësisë, kudo që ndodhen. Komuniteti shqiptar i Amerikës ka pasur festa të ndryshme që prej datës 24 nëntor, e më e madhja prej tyre mbetet ajo e shoqërisë “Vatra” në New York, ku pjesë e gëzimit ka qenë edhe këngëtarja jonë e muzikës popullore Merita Halili, tashmë pjesë e shqiptarëve të Amerikës. Entuziastë kanë qenë edhe shqiptarët që jetojnë në ishullin britanik. Në “Child Parc Hill”, flamujt shqiptarë kuqëlonin si kurrë ndonjëherë ndërsa vajzat veshur me kostume popullore u bënë objekt i kuriozitetit edhe nga vendasit. Në Toronto Kanada, flamuri i gjatë mbi tre metra është shpalosur në një nga sheshet kryesore të qytetit, ndërsa festat nëpër lokale kanë qenë thuajse në çdo cep të populluar nga shqiptarët. 100 vjet Pavarësi kanë mbërritur dhe në Evropën qendrore dhe ate juglindore. Në kryeqytetin e modës, Milano, ka pasur sërish festa e tubime të shqiptarëve që gëzojnë ditën e madhe, Athinë po kështu ndërsa valle shqipe janë hedhur edhe në ish republikat jugosllave. Në këtë mori festimesh fëmijët sigurisht rriten me ndjenjën e patriotizmit e atdhedashurisë, e ka nga ato që edhe me baballarë të huaj, mëmëdhenë e kanë primar. Një prej tyre është edhe Charli, emri i së cilës është i shënuar në tabelën e më të dalluarve në shkollën katolike “St Johns”, ku krahas fotografisë është vendosur edhe flamuri shqiptar. Ajo është në klasën e pestë, 9 vjeç dhe padyshim nxënëse e shkëlqyer. Edhe pse i ati është anglez, i pëlqen të identifikohet me gjysmën tjetër, atë shqiptare, ndaj edhe ka zgjedhur flamurin kuq e zi, në tabelën e nderit. Charli flet shqip njësoj sikurse ne e, ëndrra e saj e bërë realitet dje, ishte prezenca në Shqipëri për 100- vjetorin e Pavarësisë. Ndaj e para kur zbret nga avioni në Rinas është vajza kaçurrelse bukuroshe që mban flamurin shqiptar në duar. Realisht të bën përshtypje komunikimi me të, sepse është e lindur në Britaninë e Madhe, babin e ka anglez, por flet një shqipe të pastër. E teksa na dëgjon ne, kthehet; “Keni të drejtë, por unë kam Nani Lolën e cila më ka edukuar me shumë dashuri e respekt për vendin tim. Ajo më blen shumë libra shqip dhe unë di përmendësh poema shumë të bukura të Naim Frashrit, di Himnin Shqiptar…” ndërsa nis të recitojë pjesë prej tyre.
100-VJETORI NE GJERMANI
Eventi i pagëzuar “100 vjet! Gëzuar Shqipëri!” ka mbledhur në Hamburg të Gjermanisë emra të shquar të politikës, medias e sportit të Shqipërisë e Gjermanisë. Ndër ta, spikaste prezenca e Volker Ruhe, ish-ministër i mbrojtes së Gjermanisë, Ambasadorit të Kosovës në Gjermani, Atasheut ushtarak shqiptar atje, kryetarit të bashkisë së Hamburgut, futbollistë të mirënjohur. Në këtë mënyrë dëshmohet për një raport të shkëlyqer dypalësh midis shteteve. Kuzhina karakteristike shqiptare dhe vallet e të gjitha krahinave zunë vendin e nderit në këtë event për Shqipërinë, larg Shqipërisë!

Categories
Tags

Comments are closed.