Balerina 22-vjeçare e Klan-it lufton me vdekjen, familjarët: Na ndihmoni ta mbajmë në jetë (FOTO)

Post on: 18 November, 2013 Comments Off

TIRANE - Prej 3 javësh, balerina 22-vjeçare Sigi Gjini është në gjendje të rëndë shëndetësore, pas një aksidenti të rëndë në autostradën Tiranë-Durrës. Ajo po lufton me vdekjen në një klinikë të specializuar në Hamburg të Gjermanisë. Mësohet se 22-vjeçarja ka dëmtuar shtyllën kurrizore dhe mushkëritë dhe momentalisht mbahet në jetë me frymëmarrje artificiale. Përveçse ka hapur sytë, ajo nuk është në gjendje as të flasë dhe as të lëvizë. Sipas familjarëve, deri tani mjekët në Gjermani kanë kryer katër operacione, por vajza nuk arrin t’i lëvizë gjymtyrët.

Familjarët kanë bërë të pamundurën për ta mbajtur në jetë. Ata kanë shitur shtëpinë, sepse pagesa që kërkohet për operacionet e saj është shumë e lartë. Ndërhyrjet që i nevojiten, që ajo të paktën të mund të ulet në një karrocë me rrota, kushtojnë rreth 200.000 Euro. Prindërit e saj, të cilët tashmë kanë shitur gjithçka për të paguar shpenzimet, kanë nevojë për ndihmën e të gjithëve ne, për të shpëtuar vajzën e tyre të vetme!

APELI PER NDIHME
Për gjendjen e rëndë shëndetësore të Sigit, familja Gjini ka hapur një llogari bankare. Në ditët e saj më të vështira, familja kërkon ndihma financiare në mënyrë që të përballojë koston e operacioneve. Vajza e tyre e vetme ka nevojë më tepër se kurrë në këto momente për kontributin e shqiptarëve. Ata luten që vajza ta përballojë me sukses këtë luftë dhe kërkojnë solidarizimin e shqiptarëve për t’ju ardhur në ndihmë. Numri i llogarisë është 0007422735 Iban AL 54202110510000000007422735.

AKSIDENTI 
Aksidenti i 22-vjeçares ka ndodhur rreth 3 javë më parë. Sipas familjarëve, nga shpejtësia e madhe, Sigi ka humbur kontrollin në autostradën Tiranë- Durrës dhe makina ka dalë jashtë rrugës. Fatkeqësisht, në momentin e aksidentit, Sigi nuk e ka pasur rripin e sigurimit. Makina ka bërë disa rrotullime dhe përplasja ka shkaktuar pasoja të rënda për të.

KUSH ESHTE SIGI GJINI
Sigi Gjini ka lindur në Tiranë 22 vjet më parë. Ajo ka mbaruar shkollën e baletit, pranë Akademisë së Arteve dhe këtë vit do të diplomohej në Master. Pasioni për baletin i lindi që në fëmijëri dhe në shkollë ka shkëlqyer si një nga nxënëset më të mira. Që e vogël ka udhëtuar nga Maqedonia deri ne Amerike për turné. Ajo ka triumfuar në konkurset që janë zhvilluar për balerinët e rinj dhe gjithashtu ka spikatur si aktore në dramën “Një tablo absurde”. Sigi është një vajzë e çiltër dhe e hapur me shoqërinë. Ajo ka një karakter të fortë dhe lufton shumë për punën e saj. Në marrëdhënie me kolegët dhe familjen, Sigi është një vajzë e qeshur. Të gjithë janë të shqetësuar për Sigin. Në rrjetet sociale vihet re shqetësimi i njerëzve që pyesin çdo ditë për gjendjen shëndetësore të Sigit. Ata bëjnë pyetje çdo ditë dhe kërkojnë të informohen për ecurinë e operacioneve.

Categories
Tags

Comments are closed.